كلبي على وطني
ياوطني الموشوم بالقنابل
ياوطن الاشجار والانهار والجداول
ياوطن الاديان والايمان والتساهل
ياوطن الاشعار والاصرار والتفاؤل
ياوطن الايتام والارامل
ياوطني المقتول والمقاتل !!
انزف صبر ياوطن .. مضموم الك مية جرح
كلما يهيد الالم بجروحي اذر الملح
افديك ياوطني لومية مره انجرح
واشرب نخب هيبتك من المسا للصبح
مثلك محب مالي ومثلك جرح ما يصح
يارمح بضمايري لا خطه ولا صابني
كلبي على وطني
كلبي على وطني وي رشفة الفنجان
وبكل تحية صبح من حايط الجيران
لوما انت ياحيرتي ما كان كل ما كان
من غير ارض واهل ما قيمة الانسان ؟؟
كلبي على وطني
كلبي على وطني وي كل سحابه تفوت
وعن كل بطل مابخل فوك التراب يموت
وعن كل دمع من يشع عالخد يكع بسكوت
الماي من يغلي من لوعته يغني ..
انه انجوي ابطيبتي وكل حي طلع مني
كلبي على وطني
اهواك ياوطني لو جنتك ناري ..
وانزفلك الدم شعر واهديلك اشعاري
كل يوم نكعد سوه واحجيلك اسراري ..
معذور من سرني
ومعذور من لامني
كلبي على وطني
بالحرب شلتك نبض من ساتر لساتر
وشربتك ابخوذتي من حبك الطاهر
تغفه اعله سباتي ويبقه الكلب ساهر
ومن ضاك بيك الوكت انطيتك اخواني
كلما تذبل كمر تطلب كمر ثاني ..
لا جيت عزيتني ولا شاركت حزني
اشكيك يامنيتي لو تشتكي مني ؟؟
وبس الحزن والالم من شجرتك ينجني
كلبي على وطني
كلبي على وطني وباجر يرشني الفرح
تحت السمه الحالمه واضحك بكل المرح
انسى الجرح والالم واحرك اوراق الندم
وكلبي على وطني
للشاعر مؤيد الشلال
موضوع: كلبي على وطني 
الأربعاء فبراير 20, 2008 11:46 pm
